Okkur þykjir vænt um ef þið skrifið í gestabókina og segið ykkar álit á efni síðunnar.
Innsæis-speki Jónu Rúnu
Hégómi
Verðmætavitund okkar er misjöfn
eins og gengur. Við sem erum óþarflega hégómleg lendum oft í óþægindum vegna þess arna, m.a. sökum þess að við umlykjum okkur sjálf og aðstæður okkar óþarfa rykvef og pjatti þannig að öðrum þykir nóg um.
Hégiljuháttur er óheppilegur
í samskiptum af því að hann gerir okkur óþarflega höll undir tilgangsnauð og varhugaverð gildi. Þess vegna er rétt að við hunsum pempíuleg og prjálleg sjónarmið. Auðvitað er ekkert að því að halda sér til og leggja áherslu á að halda ytri og innri aðstæðum sómasamlegum eftir atvikum. Á hinn bóginn er beinlínis óviðeigandi og varhugavert við manngildi okkar og siðferðisþroska að leggja alla orku okkar og hugsun í einhvers konar húmbúkk og fordild sem reynist innihaldsrýr og barnaleg þegar á reynir.
Verst er þó þegar hégiljuháttur
og tepruvitund verða til þess að við eyðum um efni fram. Lítill ávinningur er í því að haga daglegum athöfnum sínum þannig að þær verði innihaldsrýrar og streituvaldandi vegna dynta og tilgerðar. Ef við erum svo hégómleg og áhrifagjörn að við teljum okkur ekki geta komist af með það sem við eigum og ráðum við að veita okkur erum við augljóslega á valdi vandræða og váar.
Slíkar kringumstæður valda okkur
frekar vonbrigðum og kvíða en vellíðan og sátt. Best er að við séum þess minnug að ef fáfengifíknin og tilgerðin ganga út í öfgar eru þær ekki þess virði að þeim sé gaumur gefinn. Þær eru engrar athygli verðar ef þær skyggja á hamingju okkar og hagsæld.
Vitundartildur og veraldarpjatt eiga ekki að vera svo plássfrekir þættir í hugsun okkar og umbúnaði að okkur líði illa ef við getum ekki umsvifalaust látið eftir okkur hvað sem við kjósum. Það er ákveðin kvöl og pína að langa til að lifa öðruvísi en aðstæður og efni leyfa. Ágætt er að við reynum að forðast allt sem vinnur á móti því að við séum heiðarleg og látlaus í fasi og framkomu. Hyggilegt er að við venjum okkur á að leggja jafn mikla áherslu á innri og ytri verðmætasköpun. Það er ekkert athugavert við það að vera svolítið fyrir pjatt og prjál, svo fremi það veiki ekki vitund okkar um mikilvægi þess að efla manngildi okkar á heflaðan og hagkænan hátt.
Allur umfram hégómi og tilgerð
sem tengd eru hégiljudríld og vitundarvanrækslu eru óheppileg og varhugaverð. Þannig lífsviðhorf ýta undir samskiptaárekstra og sálarörbirgð. Við sem unnum mannúðlegum og mildum samskiptum óskum að uppræta óþarfa rykvef og teprusjónarmið úr okkar daglega lífi. Við kjósum frekar að gefa nægjusemi og hógværð aukið líf en fordild og hégilgju, enda veljum við af alvöru og afli að auka vegsemd okkar og velgengni yst sem innst
